|
مڵه جه دڕنهو دیوارهکهینه سهرهش کێشا بهروه تا بزانۆ ئی گرد سهر و سهڏا پهی چێشییا! لالۆی کهشاوهرز تازه جه شاروه ئامه بێوه و بهسییهچش چهنی وێش ئارده بێ که خێزانهش خهریکه بێ بازش کهرێ .
مڵه تۆزیه لۆوسێش لێستێوه و دلێ دڵۆ وێشهنه واتش: بهشکیم واردهمهنیه دهردهو ئاما بۆ. بهڵام وهختێ بهسهشا باز کهرد،لاشهو مڵهی کهوت لهرزه لهرز ؛ چونکوو لالۆی کهشاوهرز تهڵێ مڵهیش ئهستێ بێ .
مڵه ڕهمه ڕهم گێڵاوه پهی لێ باخی تا ئی ههواڵهیه بۆونێ به باقی حهیوانهکا. مڵهی ئاقیوهو شهڕ یاوێ به حهر کهسی واچێ: تهڵییه مڵهیشا ئاردێنه لێ باخی،ساحێو باخ تهلییه مڵهیش ئهستێنه ...
کهرگی کاتێوه ئی ههواڵشه ژنۆوت، تۆزیه باڵه فرتێش کهردێ و واتش: مڵه گیان فره داخم ئامهنه پهیت. چیلایوه مشیۆ فره هۆشت وێتوه بۆ ،به حهر حاڵ نه من کاریهم ههن به تهڵێ مڵهیوه نه تهڵێ مڵهی کاریهش ههن منوه .
بهران وهختیه ئی دهنگ و باسشه پهنه یاوا،سهڏای گڕهش بهرزوه کهرده و واتش: مڵه گیان، من دۆعایو پهی مهکهروو نهوی ئی تهڵێوه ، چون وێت مهزانی تهڵێ مڵهی پهیوهنییهش به من نیهن بهڵام دڵ متمان به که دۆعاو من پهشت و پهناتهن .
مڵه که جه حهیوانهکاو باخی تهماو یاردی و هام دهردیش بێ، لوا شۆنهو گاوی. بهڵام گاویچ تا خهوهرش ژنۆوت، سهریهش تهکانه داو واتش: من تا ئیسه نهڏیهنم گاویه بۆ تهڵێ مڵهیوه! ئاڏیچ ئینهشه وات و چیروو لچیوه زهردهخهنێیهش دانه و دیسان خهریکۆ لهوهڕیهی بیوه .
ئاقیبهت، مڵه نا ئۆمێڏ جه گرد لا، گێڵاوه پهی وڵهکێش و چی فکرانه بێ که ئهگهر ڕۆیه گنۆ لێ تهڵێ، چێش مهبۆ؟
دهسی بهر قهزا نیمهو ئا شهوێ،تهقهو دریا یۆ چێویه لێ یانهینه بهرزوه بی. ژهنی لالۆی کهشاوهرزی بێ مفتهڵا کهردهی هۆرزاوه و لوا پهی ئاوێشخانی (ئهمبار) تا چهمش گنۆ به مڵهی گیر کهوتهی، بهڵام لێ تاریکینه نهزاناش ئی چێوه که بیهن تهڵێوه مڵه نیهن بهڵکوو مارێوه سامناک و خهتهرناکهن که دووچکهش لێ تهڵهکێنه گیرش کهرده بێ. تا ژهنی نزیکۆ تهڵێوه بیه، مارهکه پاش گهسته و قیژ و داڏش بهرزوه بی. ساحێو باخ به هاوار و داڏ کهردهو ژهنهیوه چڵهکیاره و لوا شوونی سهڏایره، وهختیه چهمش کهوت به ژهنهکێش، بێ ئاما و لوا کهردهی و وهخت فهوتنهی یاوناش به نهوهشخانهی (بیمارستان). دماو چننه ڕۆیه حاڵش باشتهر بی. بهڵام ئا ڕوه که ئامهوه پهی یانهی، هیشتهی تۆزیه یاوش بێ. ژهنه هامساکێشا که ئامێ بێ دیڏهنیش، واتش: هیچ چاشتیه پێسهو فرووجاوهی پهی ئی یاوهیشه باشه نیهنه. لالۆی کهشاوهرزیچ که ژهنهکێش فره وهشه گهرهکه بێ پهله پهل لوا کهرگیش کولانهنه بهر ئارده و سهرهش جیاوه کهرده و کهردهش فرووجاوی و بۆوهو وهشهو فرووجاوهی دلێ کهوێڵینه پهخشوه بی. بهڵام حهر چی سهورشا کهرد یاوۆ ژهنهی نهبڕیاوه. خزم و کهسهکاش شهو و ڕۆ ئاما و لواشا بێ تا دهنگ و باسش بزانا. پهی ئینهیه لالۆی کهشاوهرز مهجبوور بی تا بهرانیچ قوروانی کهرۆ تا به گۆشتهکهش چاشتهو مێمانه ئازیزهکاش بنیۆ سهر. ڕوێ ویهرێنێ و حاڵۆ ژهنهیچ ڕۆ به ڕۆ خراوتهر بێ. ژهنی داماگه که جه تاوۆ ئێشینه پێچی دێ وێش ئاخرش کهوته گیان کهنشت و گیانی شیرینش جه دهس دا و مهرده. خهوهرۆ مهرگۆ ژهنهی پێسهو برقی لێ دهگاینه وهڵاوه بی. مهردمیه فره پهی فاتهخوانی مجیا ملۆ لالۆی کهشاوهرزیماره. کهشاوهرزی داماگیچ پهی چاشتهو مهردمی هیچش پهی نهکریا بێژ ئانهیه که سهرهو گاویچ کهرۆ فیداو مێمانا .
ئیسه فهقهت مڵه مهنه بێ که تاق و تهنیا لێ باخیره گێڵی و یاڏۆ ئا حهیوانه بهسه زوانانه کهرێوه که کارشا به تهڵێ مڵهیوه نهبێ .
| 
