یۆ جه‌ گه‌وره‌کاو عه‌ره‌بی که‌ به‌ ناشیرینی چۆرچه‌می و ناباری رۆخساری مه‌شهوور بێ، ژه‌نێوه‌ فره‌ جوانه‌ و وه‌ش ڕه‌فتاره‌ش بێ. ڕۆیه‌ ژه‌نێ واتش په‌نه‌ش: متمانیم هه‌نه‌ که‌ من و تۆ هه‌ر دویما یاگێما هینا به‌هه‌شته‌نه‌. واتش: چه‌نی مه‌زانی؟ واتش: چاگه‌وه‌ که‌ تۆ ڕوومه‌تۆ جوانۆ من مه‌وینی و شوکرانه‌ ماچی وه‌ منیچ رۆخساری نابارۆ تۆ مه‌وینوونێ و تاقه‌ت ماروو، وه‌ صابر و شاکر هه‌ر دوی یاگێشا به‌هه‌شته‌نه‌.

 مڵه‌ جه‌ دڕنه‌و دیواره‌که‌ینه‌ سه‌ره‌ش کێشا به‌روه‌ تا بزانۆ ئی گرد سه‌ر و سه‌ڏا په‌ی چێشییا! لالۆی که‌شاوه‌رز تازه‌ جه‌ شاروه‌ ئامه‌ بێوه‌ و به‌سییه‌چش چه‌نی وێش ئارده‌ بێ که‌ خێزانه‌ش خه‌ریکه‌ بێ بازش که‌رێ. مڵه‌ تۆزیه‌ لۆوسێش لێستێوه‌ و دلێ دڵۆ وێشه‌نه‌ واتش: به‌شکیم وارده‌مه‌نیه‌‌ ده‌رده‌و ئاما بۆ. به‌ڵام وه‌ختێ به‌سه‌شا باز که‌رد،لاشه‌و مڵه‌ی که‌وت له‌رزه‌ له‌رز ؛ چونکوو لالۆی که‌شاوه‌رز ته‌ڵێ مڵه‌یش ئه‌ستێ بێ. مڵه‌ ڕه‌مه‌ ڕه‌م گێڵاوه‌ په‌ی لێ باخی تا ئی هه‌واڵه‌یه‌ بۆونێ به‌ باقی حه‌یوانه‌کا. مڵه‌ی ئاقیوه‌و شه‌ڕ یاوێ به‌ حه‌ر که‌سی واچێ: ته‌ڵییه‌ مڵه‌یشا ئاردێنه‌ لێ باخی،ساحێو باخ ته‌لییه‌ مڵه‌یش ئه‌ستێنه‌ ...